Solidaritéit zu Beefort

Zanter dem Freideg, den 20. Mäerz, lauden zu Beefort all Owend ëm 20 Auer d’Klacke vun der Beeforter Kierch. Et ass een Zeeche vu Solidaritéit mat alle Matbierger an de sämtleche Beräicher, déi an dëser aktueller Situatioun am Déngscht vun hire Matmënsche sinn an dozou bäidroen, datt d’ëffentlech Liewe weidergeet. Dobäi dierf een nët vergiessen, datt dës Leit och Familljen hunn an duerch hiren Asaz sech selwer der Gefor vun enger Infektioun aussetzen. Regelméisseg stelle sech d’Beeforter Leit all Owend virun hir Dir an applaudéieren hire Matmënschen.

Zu enger gréisserer Aktioun koum et den éischte Sonndeg am Abrëll an der Reisduerferstrooss. Kuerz virun 20 Auer hu sech hei d’Leit op den Trottoir gestallt an hunn pénktlech um 20 Auer applaudéiert. Zum Ofschloss vun der Aktioun hu se zesummen a mam néidegen Ofstand zum jeeweilegen Noper op besser Zäite mat engem gudde Pättchen ugestouss.